Kürdəxanı qəsəbəsində yeni su təchizatı sistemlərinin istismara verilməsinin açılış mərasimi keçirilmişdir

“Azərsu" Açıq Səhmdar Cəmiyyəti ilə Koreya Beynəlxalq Əməkdaşlıq Agentliyinin (KOİCA) birgə həyata keçirdiyi “Abşeron yarımadasında su çatışmazlığı üzrə ümumi həll: Abşeron yarımadasının Kürdəxanı qəsəbəsində su təchizatı sistemlərinin yaradılması” layihəsi uğurla başa çatmışdır. Martın 14-də Kürdəxanı qəsəbəsində yeni su təchizatı sistemlərinin istismara verilməsinə həsr olunmuş açılış mərasimi keçirilmişdir. Mərasimdə “Azərsu” Açıq Səhmdar Cəmiyyətinin sədri Qorxmaz Hüseynov, Koreya Respublikasının Azərbaycandakı səfiri Çoi Suk-in, KOİCA-nın vitse-prezidenti Kim İn, Sabunçu rayon İcra Hakimiyyətinin başçısı Adil Vəliyev və ictimaiyyət nümayəndələri iştirak etmişlər.

 “Azərsu” ASC-nin sədri Qorxmaz Hüseynov ölkə əhalisinin keyfiyyətli və fasiləsiz içməli su ilə təmin olunmasını Prezident İlham Əliyevin daim diqqətdə saxladığını xatırladaraq qeyd etmişdir ki, hazırda respublikanın 40-dək şəhər  və rayon mərkəzində,  həmçinin Bakıətrafı qəsəbələrdə  içməli su və kanalizasiya layihələri icra olunur. Bakı şəhəri və ətraf qəsəbələrin sosial iqtisadi inkişafı dövlət proqramına uyğun olaraq 2013-cü ilin mayında Kürdəxanı qəsəbəsində yeni içməli su layihəsinin icrasına başlanılmışdır. Bu layihə 2035-ci ilə perspektiv inkişaf nəzərə alınmaqla Kürdəxanı qəsəbəsində 26250 nəfərin su təchizatının əsaslı şəkildə yaxşılaşdırılmasına hesablanmışdır:  “Koreya şirkətləri tərəfindən həyata keçirilən tikinti-quraşdırma işləri qısa müddətdə tam başa çatdırılmışdır. Layihə çərçivəsində qəsəbədə polietilen borularla 97,2 km uzunluğunda içməli su xətləri çəkilmiş, 3945 ünvana birləşmə verilmiş və  bütün abunəçilər smart sayğaclarla təmin edilmişdir. Bununla da 14300 nəfər qəsəbə sakini 24 saat fasiləsiz rejimdə içməli su ilə təmin olunmuşdur. Eyni zamanda yanğın təhlükəsizliyi məqsədi ilə qəsəbənin müxtəlif yerlərində 436 yanğın hidrantı quraşdırılmışdır”.

Koreya Respublikasının Azərbaycandakı səfiri Çoi Suk-in çıxışında Azərbaycan və Koreya arasında iqtisadi, siyasi və mədəni əlaqələrin yüksələn xətlə inkişaf etdiyini yüksək qiymətləndirmişdir. Səfir ölkəsinin Azərbaycanda həyata keçirilən layihələrə bundan sonra da dəstək verəcəyini bildirmişdir.

     KOİCA-nın vitse-prezidenti Kim İn layihə haqqında məlumat verərək bildirmişdir ki, təmsil etdiyi təşkilat Azərbaycan hökuməti ilə sıx əməkdaşlıq edir: “Kürdəxanı qəsəbəsinin su təchizatının yaradılması üçün Koreya hökuməti Azərbaycana 26,18 milyon ABŞ dolları məbləğində yardım (qrant) ayırmışdır. Kürdəxanı qəsəbəsinin içməli su təchizatının yaxşılaşdırılması layihəsinin vaxtında və keyfiyyətlə icrası bu uğurlu əməkdaşlığın bariz nümunəsidir. Bizim işlərimiz bununla yekunlaşmır. Pirşağı qəsəbəsinin yaxınlığında tikiləcək çirkab sutəmizləyici qurğunun inşasına Koreya hökuməti kredit ayırmışdır və artıq bu il işlərə başlanılacaqdır. KOICA-nın ayıracağı qrant hesabına Beyləqan rayonu ərazisində Xocavənd qəsəbəsinin su təchizatı sistemlərinin yaradılması da nəzərdə tutulur”.

     Sabunçu rayon İcra Hakimiyyətinin başçısı Adil Vəliyev su təchizatının və kanalizasiya sistemlərinin yenidən qurulmasının qəsəbənin sosial-iqtisadi inkişafına töhfə verdiyini diqqətə çatdırmışdır. Qeyd olunmuşdur ki, bu layihənin icrası  Kürdəxanı qəsəbəsinin uzun illərdir mövcud olmuş  içməli su problemini birdəfəlik həll etmişdir.

Qəsəbə sakinləri adından çıxış edən Vamiq Məmmədəliyev Kürdəxanı qəsəbəsinin içməli su probleminin qısa müddətdə həll edilməsinə görə ölkə başçısına, Koreya hökumətinin nümayəndələrinə, “Azərsu” ASC-nin əməkdaşlarına minnətdarlığını bildirmişdir.

Daha sonra layihənin açılışı olmuşdur.

Qeyd edək ki, bu layihə çərçivəsində Kürdəxanı qəsəbəsində 1400 mm diametrli dəmir beton borularla 761 metr uzunluğunda mikrotunel tipli kanalizasiya kollektoru da  tikilmişdir. Su şəbəkəsi və kanalizasiya kollektorunun tikintisi Sunjin Engineering və Yooshin Engineering şirkətləri tərəfindən layihələndirilmiş, Hyundai Engineering və Halla Energy&Environment şirkətləri isə tikinti-quraşdırma işlərini həyata keçirmişdir. Tikintiyə texniki nəzarəti Koreyanın “Saman” məsləhətçi şirkəti yerinə yetirmişdir.

Növbəti mərhələdə qəsəbə yaxınlığında hər birinin tutumu 10 min kubmetr olan 2 ədəd su anbarı da tikiləcək. “+41 Kürdəxanı” su anbarından Kürdəxanı qəsəbəsi ilə yanaşı, Pirşağı və digər ətraf yaşayış məntəqələri də qidalanacaqdır. Eyni zamanda Kürdəxanı qəsəbəsində yeni kanalizasiya şəbəkəsinin yaradılması da nəzərdə tutulur. Azərbaycan hökuməti tərəfindən maliyyələşdiriləcək layihəyə uyğun olaraq qəsəbədə 77,3 km uzunluğunda kanalizasiya şəbəkəsi və 3,8 km uzunluğunda  kanalizasiya kollektorunun tikintisi nəzərdə tutulur. Kürdəxanı qəsəbəsində yaranan tullantı suları inşasına hazırlıq görülən Pirşağı Çirkab Sutəmizləyici Qurğusuna  ötürüləcəkdir. Məhsuldarlığı sutkada 40 min kubmetr layihələndirilən qurğunun tikintisi Koreya hökuməti ilə birgə maliyyələşdiriləcəkdir. Hazırda məsləhətçi şirkət tərəfindən ilkin layihələndirmə və tender sənədlərinin hazırlanması işləri aparılır. Qurğunun tikintisinə 2015-ci ilin sonlarında başlanılması planlaşdırılır.