Xaçmaz, Xızı, Qobustan şəhərlərində və Altıağac qəsəbəsində çirkab sutəmizləyici qurğu tikiləcək
“Azərsu” Açıq Səhmdar Cəmiyyəti “Kiçik şəhərlərdə su təchizatı və kanalizasiya layihəsi” çərçivəsində Xaçmaz, Xızı, Qobustan şəhərlərində və Altıağac qəsəbəsində Çirkab Sutəmizləyici Qurğuların (ÇSTQ) tikintisi üzrə tender elan etmişdir. Azərbaycan Hökumətinin iştirak payı və Yaponiya Beynəlxalq Əməkdaşlıq Agentliyinin krediti hesabına maliyyələşdirlən layihə çərçivəsində həmin şəhərlərin hər birində çirkab sutəmizləyici qurğular kompleksi yaradılacaq.
Layihəyə uyğun olaraq Xaçmaz şəhərində sutkalıq gücü 30,4 min kubmetr olan çirkab sutəmizləyici qurğu tikiləcək. Xaçmaz şəhəri ilə yanaşı Quba və Qusar şəhərlərindən axıdılan çirkab sular da bu qurğuda təmizlənəcək. Bununla paralel olaraq Xızı şəhərində sutkalıq gücü 740 kubmetr, Qobustan şəhərində 2270 kubmetr, Altıağac qəsəbəsində 239 kubmetr olan çirkab sutəmizləyici qurğular tikiləcək.
