Prezident İlham Əliyev: Hədəfimiz bütün ölkə ərazisində içməli su təchizatının 100 faiz təmin edilməsidir

Azərbaycan Respublikasının Prezidenti İlham Əliyevin Almaniyaya səfəri səfəri çəçivəsində bu ölkənin aparıcı şirkətlərinin rəhbərləri ilə görüşü olub. Görüşdə iqtisadiyyatın müxtəlif sahələrində əməkdaşlıqla bağlı fikir mübadiləsi aparılıb. Almaniyanın “Tauber” şirkətinin nümayəndəsi Jan-Bernd Kappelhoff əməkdaşlıq barədə təkliflər səsləndirib: “Bizim şirkət Almaniyada, həmçinin Portuqaliyada və İsveçrədə fəaliyyət göstərir. Şirkətimiz infrastrukturun yaradılması və saxlanılması üzrə ixtisaslaşıb. Vaxtilə biz “Azərsu” üçün işlər icra etmişik. Ümidvaram ki, biz gələcəkdə “Azərsu” üçün yenidən işlər görə bilərik”.

Prezident İlham Əliyev Azərbaycanda içməli su təchizatının 100 faiz təmin edilməsinin əsas hədəf olduğunu, bu istiqamətdə layihələr həyata keçirildiyini bildirib: “Suyun paylanması ilə bağlı görülməli çox iş olacaq. Hazırda biz su təchizatı və sanitariya şəraitinin yaxşılaşdırılmasına ehtiyac duyduğumuz bir çox şəhərdə layihələr həyata keçiririk. Hədəfimiz bütün ölkə ərazisində içməli su təchizatının 100 faiz təmin edilməsidir. Sözsüz ki, bunu etmək çətin olacaq, çünki görülməli işin həcmi böyükdür. Lakin bizim, həmçinin su ehtiyatlarının idarə olunması sahəsində bəzi struktur islahatlarının həyata keçirilməsi ilə bağlı planlarımız var. Bunun vaxtı gəlib çatıb. Hazırda hökumət müxtəlif variantları və xüsusilə indi suyun ildən-ilə azaldığını gördüyümüz bir vaxtda, suyun paylaşdırılması ilə bağlı müasir texnologiyaların tətbiqini dəyərləndirir. Qeyd etdiyim kimi, Xəzər dənizi dayazlaşır, həmçinin çaylarımızda, transsərhəd çaylarında və mənbəyini Azərbaycandan götürən çaylarda sululuq azalıb. Əfsuslar olsun ki, biz bunu görürük. Beləliklə, su ehtiyatlarının idarə olunması, su ehtiyatlarından səmərəli istifadə sözsüz ki, qarşıdakı illər üçün prioritetlərdən biri olacaq”.