Abşeron rayonunda kənd və qəsəbələrin içməli su təchizatı yaxşılaşdırılır

 “Azərsu” Açıq Səhmdar Cəmiyyəti Abşeron yarımadasının kənd və qəsəbələrinin içməli su təchizatı və kanalizasiya xidmətlərinin yaxşılaşdırılması istiqamətində tədbirləri davam etdirir.  Abşeron rayonunun kənd və qəsəbələrində işlər həm “2011-2013-cü illərdə Bakı şəhəri və onun qəsəbələrinin sosial-iqtisadi inkişafı  Dövlət Proqramı”na, həm də “Azərsu” ASC-nin təsdiq etdiyi tədbirlər planına  uyğun həyata keçirilir.

 Cari ilin yanvar-oktyabr aylarında “Abşeron Sukanal” İdarəsinin xidmət göstərdiyi ərazilərdə “Azərsu” ASC-nin təsdiq etdiyi tədbirlər planına  uyğun olaraq 13,5 km uzunluğunda su, 3 km uzunluğunda kanalizasiya xətti çəkilmişdir. Nəticədə Abşeron rayonununda 10 mindən artıq insanın fasiləsiz su təchizatı təmin olunmuşdur. Bununla paralel olaraq rayonda sayğaclaşma işləri də davam etdirilmişdir. Cari ilin 9 ayında rayon üzrə 4776 əhali və qeyri-əhali qrupu abinəçisi sayğaclarla təmin olunmuşdur. Quraşdırılan  sayğacların 400-ə qədəri smart-kart tipli sayğaclardır. Ümumilikdə rayon üzrə sayğaclaşma səviyyəsi 51,5 faiz təşkil edir. Hazırda smart-kart sayğacların quraşdırılması davam etdirilir. “Abşeron Sukanal” İadrəsi 60560 abunəçiyə xidmət göstərir. Bunlardan 59566-sı əhali, 994-ü qeyri-əhali qrupu abunəçisidir.

         Qeyd edək ki, “2011-2013-cü illərdə Bakı şəhəri və onun qəsəbələrinin sosial-iqtisadi inkişafı  Dövlət Proqramı” çərçivəsində hazırda  Abşeron rayonunun Saray, Mehdiabad, Digah, Novxanı, Fatmayı, Məhəmmədi və Goradil qəsəbələrində su təchizatı və kanalizasiya sistemlərinin yaxşılaşdırılması üzrə layihələr həyata keçirilir.