Xızı şəhərinin və Altıağac qəsəbəsinin su təchizatı və kanalizasiya şəbəkələrinin yenidən qurulması üzrə tender elan edilmişdir
“Azərsu” Açıq Səhmdar Cəmiyyəti “Kiçik şəhərlərdə su təchizatı və kanalizasiya layihəsi” çərçivəsində Xızı şəhəri və Altıağac qəsəbəsinin su təchizatı və kanalizasiya şəbəkələrinin yenidən qurulması üzrə tender elan etmişdir. Azərbaycan Hökumətinin iştirak payı və Yaponiya Beynəlxalq Əməkdaşlıq Agentliyinin krediti hesabına maliyyələşdirilən layihə çərçivəsində Xızı şəhəri və Altıağac qəsəbəsinin su təchizatı və kanalizasiya infrastrukturu yaxşılaşdırılacaq.
Layihəyə əsasən, Xızı şəhəri və Altıağac qəsəbəsini keyfiyyətli və dayanıqlı içməli su ilə təmin etmək üçün yüksəksıxlıqlı polietilen borularla 39,5 kilometr uzunluğunda paylayıcı şəbəkə çəkiləcək, 6 ədəd su anbarı və 3 xlorator qurğusu tikiləcək. Yaşayış məntəqələrinin kanalizasiya sisteminin yenidən qurulması məqsədi ilə yüksəksıxlıqlı polietilen borularla 22,5 kilometr kanalizasiya şəbəkəsi və 3,6 kilometr uzunluğunda magistral kollektor çəkiləcək.
